കലണ്ടർ
* 'കലൻഡേ' എന്ന ലാറ്റിൻ വാക്കിൽനിന്നാണ് കലണ്ടർ എന്ന പദമുണ്ടായത്. 'കണക്കു കൂട്ടുക’ എന്നാണ് കലൻഡേ എന്ന വാക്കിനർഥം.
* ചന്ദ്രനെ അടിസ്ഥാനപ്പെടുത്തിയുള്ള കലണ്ടർ കണ്ടുപിടിച്ചത് മെസോപ്പൊട്ടേമിയക്കാരാണ്.
* ഒരു ദിവസത്തെ 24 മണിക്കുറുകളായി വിഭജിച്ചതും മെസോപ്പൊട്ടേമിയക്കാരാണ്.
* സൂര്യനെ ആധാരമാക്കിയുള്ള സൗരപഞ്ചാംഗം കണ്ടുപിടിച്ചത് ഈജിപ്പുകാരാണ്.
* തെക്കേ അമേരിക്കയിലെ പ്രാചീന ജനതയായ മായൻമാരുടെ കലണ്ടറിൽ ഒരു വർഷം 365 ദിവസങ്ങളായിരുന്നു.
* മായൻമാരുടെ കലണ്ടറിൽ ഒരു വർഷം 18 മാസങ്ങളായിരുന്നു.
* ഒരു മാസത്തിൽ 20 ദിവസങ്ങളാണ് മായൻ കലണ്ടറിൽ ഉണ്ടായിരുന്നത് വർഷത്തിലെ 5 ദിവസങ്ങൾ മായൻമാർ നിർഭാഗ്യദിവസങ്ങളായി കരുതിപ്പോന്നു.
* മായൻ കലണ്ടർ അവസാനിച്ച 2012 ഡിസംബർ 21ന് ലോകാവസാനമാകുമെന്ന് കുപ്രചരണങ്ങൾ ഉണ്ടായിരുന്നു.
* ബി.സി. 46-ൽ ജൂലിയസ് സീസർ ആരംഭിച്ചതാണ് ജൂലിയൻ കലണ്ടർ. സോസിജിൻസി എന്ന വാനശാസ്ത്രജ്ഞന്റെ ഉപദേശപ്രകാരമാണ് ജൂലിയസ് സീസർ കലണ്ടർ ആരംഭിച്ചത്.
* ജൂലിയൻ കലണ്ടറിൽ 365 ദിവസങ്ങൾ ഉണ്ടായിരുന്നു. 'അധിവർഷം' എന്ന ആശയം ആദ്യമായി അവതരിപ്പിച്ചത് ജൂലിയൻ കലണ്ടറാണ്
* ലോകത്ത് ഇന്ന് ഏറ്റവും വ്യാപകമായി ഉപയോഗിക്കുന്ന കലണ്ടർ സംവിധാനമാണ് ഗ്രിഗോറിയൻ കലണ്ടർ. 1582ൽ ഗ്രിഗോറിയൻ കലണ്ടർ സ്ഥാപിച്ചത് ഗ്രിഗറി പതിമൂന്നാമൻ മാർപാപ്പയാണ്
* ജൂലിയൻ കലണ്ടറിലെ പോരായ്മകൾ പരിഹരിച്ചു കൊണ്ടാണ് ഗ്രിഗോറിയൻ കലണ്ടർ നിലവിൽ വന്നത്. അലോഷിയസ് ലിലിയസ് എന്ന ഭിഷഗ്വരനാണ് മാർപാപ്പയുടെ കല്പന അനുസരിച്ച് ഗ്രിഗോറിയൻ. കലണ്ടർ രൂപപ്പെടുത്തിയത്.
* യേശുക്രിസ്തു ജനിച്ച വർഷമായ എ.ഡി.1 അടിസ്ഥാനമാക്കിയാണ് ഗ്രിഗോറിയൻ കലണ്ടറിൽ വർഷങ്ങൾ ചിട്ടപ്പെടുത്തിയിരിക്കുന്നത്.
* സ്പെയിൻ, പോർച്ചുഗൽ, ഇറ്റലി, പോളണ്ട് എന്നിവയാണ് ഗ്രിഗോറിയൻ കലണ്ടർ ആദ്യമായി അംഗീകരിച്ച രാജ്യങ്ങൾ.
* ജനവരി മുതൽ ഡിസംബർ വരെയുള്ള 12 മാസങ്ങളാണ്ഗ്രിഗോറിയൻ കലണ്ടറിലുള്ളത്.
* റോമൻ ഐതിഹ്യത്തിലെ ജാനസ് ദേവന്റെ പേരിൽ നിന്നാണ് ജനവരി മാസത്തിന് ആ പേര് ലഭിച്ചത്.
* കവാടങ്ങളുടെയും വാതിലുകളുടെയും ദേവനാണ് ജാനസ്.
* 30 ദിവസത്തിൽ കുറവുള്ളതും ഏറ്റവും ചെറുതുമായ മാസമാണ് ഫിബ്രവരി.
* നാലു വർഷത്തിലൊരിക്കലുളള അധിവർഷങ്ങളിൽ ഫിബ്രവരിക്ക് 29 ദിവസങ്ങളുണ്ടാവും.
* 'ശുദ്ധീകരണം' എന്നർഥം വരുന്ന ഫിബ്രം എന്ന ലാറ്റിൻ വാക്കിൽ നിന്നാണ് ഫിബ്രവരി എന്ന പേരുണ്ടായത്.
* മാർച്ച് മാസത്തിന് ആ പേര് ലഭിച്ചത് റോമാക്കാരുടെ യുദ്ധദേവനായ മാർസിൽ നിന്നാണ് ജൂനോ എന്ന റോമൻ ദേവതയുടെ പേരിൽ നിന്നാണ് ജൂൺ മാസത്തിന്റെ പേരുണ്ടായത്.
* ജൂലിയസ് സീസറുടെ സ്മരണാർഥം നാമകരണം ചെയ്യപ്പെട്ട മാസമാണ് ജൂലായ്.
* ഇന്ത്യയുടെ ദേശീയ കലണ്ടറാണ് ശകവർഷം. കുശാന രാജാവായ കനിഷ്കനാണ് എ.ഡി. 78-ൽ ശകവർഷം ആരംഭിച്ചത്.
* 1957 മാർച്ച് 22-നാണ് ശകവർഷത്തെ ഇന്ത്യയുടെ ദേശീയ കലണ്ടറായി അംഗീകരിച്ചത്.
* 12 മാസങ്ങളുളള ശകവർഷത്തിലെ ആദ്യമാസം ചൈത്രവും, അവസാനമാസം ഫാൽഗുനവുമാണ്.
* ചൈത്രം, വൈശാഖം, ജ്യേഷ്ഠം, ആഷാഢം, ശ്രാവണം, ഭാദ്രം, ആശ്വിനം, കാർത്തികം, ആഗ്രഹായണം, പൗഷം, മാഹം, ഫാൽഗുനം എന്നിവയാണ് ശകവർഷമാങ്ങൾ
* 2009 എന്നത് ശകവർഷപ്രകാരം 1931 ആയിരുന്നു.
* മലയാളം കലണ്ടറാണ് കൊല്ലവർഷം. എ.ഡി. 825-ൽ ഉദയ മാർത്താണ്ഡവർമയാണ് കൊല്ലവർഷം ആരംഭിച്ചതെന്നു കരുതപ്പെടുന്നു.
* സൂര്യനെ കേന്ദ്രീകരിച്ചുള്ള കലണ്ടർ സംവിധാനമാണ് കൊല്ലവർഷം.
* മലയാളം കലണ്ടറിലെ ആദ്യമാസം ചിങ്ങവും അവസാനമാസം കർക്കടകവുമാണ്
* സൂര്യനെ ആധാരമാക്കിയുള്ള തമിഴ് കലണ്ടറിനും 12 മാസങ്ങളുണ്ട്.
* തമിഴ് കലണ്ടറിലെ ആദ്യമാസം ചിത്തിരൈയും അവസാനമാസം പങ്കുനിയുമാണ്
* ഇസ്ലാംമതത്തിലെ ഔദ്യോഗിക കലണ്ടറാണ് ഹിജറാ കലണ്ടർ.
* ചന്ദ്രനെ അടിസ്ഥാനപ്പെടുത്തിയുള്ള 12 മാസങ്ങളാണ് ഹിജറാ കലണ്ടറിലുളളത്.
* മുഹമ്മദ് നബി മക്കയിൽ നിന്നും മദീനയിലേക്ക് പലായനം ചെയ്ത എ.ഡി. 622 മുതലാണ് ഹിജറവർഷം ആരംഭിക്കുന്നത്.
* ഇസ്ലാമിക കലണ്ടറിലെ ആദ്യമാസം മുഹറമും അവസാനമാസം ദുൽഹജ്ജുമാണ്.