കേൾവിശേഷി കുറഞ്ഞ കുട്ടികൾക്ക് പ്രായത്തിന് അനുസൃതമായി ഭാഷയും സംസാരവും വികസിപ്പിക്കാൻ മികച്ച പരിശീലനംകൊണ്ട് സാധിക്കുമെന്ന് തെളിഞ്ഞിട്ടുള്ളതാണ്. മൂന്നുവയസ്സിനുമുമ്പ് കേൾവിക്കുറവ് കണ്ടുപിടിക്കുകയും അനുയോജ്യമായ ശ്രവണസഹായി ഉപയോഗിക്കുകയും വേണം. ആറു വയസ്സുവരെയുള്ള കേൾവിക്കുറവുള്ള കുഞ്ഞുങ്ങളുടെ ഭാഷാപരിശീലനത്തിനായി മികച്ച അധ്യാപകരെ വാർത്തെടുക്കുക എന്ന ലക്ഷ്യത്തോടെ റീഹാബിലിറ്റേഷൻ കൗൺസിൽ ഓഫ് ഇന്ത്യ സംഘടിപ്പിക്കുന്ന കോഴ്സാണ് ഡിപ്ളോമ ഇൻ ഏർളി ചൈൽഡ്ഹുഡ് സ്പെഷ്യൽ എജ്യുക്കേഷൻ. ഒരുവർഷത്തെ കോഴ്സ് പാസാകുന്നവർക്ക് ആറുവയസ്സുവരെയുള്ള കേൾവിക്കുറവുള്ള കുട്ടികൾക്കായുള്ള ഏർളി ഇന്റർവെൻഷൻ സെന്ററുകളിൽ ജോലിസാധ്യതയുണ്ട്. പ്ലസ്ടു അല്ലെങ്കിൽ തത്തുല്യ പരീക്ഷ കുറഞ്ഞത് 50 ശതമാനം മാർക്കോടെ വിജയിച്ചവർക്ക് അപേക്ഷിക്കാം. സംവരണവിഭാഗങ്ങൾക്ക് നിയമപ്രകാരമുള്ള ഇളവുകളുണ്ട്. മെറിറ്റ് അടിസ്ഥാനത്തിൽ കേന്ദ്രീകൃത ഓൺലൈൻ പ്രവേശനമാണുള്ളത്. അവസരങ്ങൾ ഏറെ സംസാരഭാഷ ആംഗ്യഭാഷയിലേക്കും തിരിച്ചും തർജ്ജമ ചെയ്യുക എന്നതാണ് ആംഗ്യഭാഷാ വിവർത്തകരുടെ ഉത്തരവാദിത്വം. ശ്രവണ, സംസാര പരിമിതിയുള്ള 1.8 കോടി ആളുകളാണ് ഇന്ത്യയിലുള്ളത്. ആംഗ്യഭാഷാ വിവർത്തകരാകട്ടെ ഉദ്ദേശം 250 പേർ മാത്രവും. ദൃശ്യ വാർത്താമാധ്യമങ്ങൾ, സർക്കാർ ഔദ്യോഗിക പരിപാടികൾ, വിദ്യാഭ്യാസമേഖല എന്നിവിടങ്ങളിൽ ആംഗ്യഭാഷാ വിവർത്തകരുടെ സേവനങ്ങൾ ഇപ്പോൾ നിർബന്ധമാക്കിയിരിക്കുന്നു. ഈ കുറവ് പരിഹരിക്കാനും വിദഗ്ധരായ ഇന്ത്യൻ ആംഗ്യഭാഷാ വിവർത്തകരെ സൃഷ്ടിക്കാനും റീഹാബിലിറ്റേഷൻ കൗൺസിൽ ഓഫ് ഇന്ത്യ സംഘടിപ്പിക്കുന്ന ദ്വിവത്സര കോഴ്സ് ആണ് ഡിപ്ലോമ ഇൻ ഇന്ത്യൻ സൈൻ ലാംഗ്വേജ് ഇന്റർപ്രെട്ടേഷൻ. 50 ശതമാനം മാർക്കിൽ കുറയാതെ പ്ലസ്ടു അല്ലെങ്കിൽ തത്തുല്യ പരീക്ഷ വിജയിച്ചവർക്ക് അപേക്ഷിക്കാം. സംവരണാനുകൂല്യങ്ങൾ ലഭ്യമാണ്. ഈ കോഴ്സുകളിലേക്ക് താത്‌പര്യമുള്ളവർ താഴെക്കാണുന്ന ലിങ്കിൽ രജിസ്റ്റർ ചെയ്യണം. http://www.rciamas.nic.in/aioat2020/RegistrationPage.aspx. കൂടുതൽ വിവരങ്ങൾക്ക് http://rciamas.nic.in/AIOAT2020/indexadm2020.html എന്ന ലിങ്ക് സന്ദർശിക്കുക. കോഴ്സിന്റെ പ്രോസ്പെക്ടസിനായി നിഷിന്റെ വെബ്സൈറ്റ് സന്ദർശിക്കണം. www.nish.ac.in, ഹെൽപ് ഡെസ്ക് നമ്പർ: 0471-2944635/9744970847. Learn to Teach Sign Language at NISH