അഴകത്ത് പത്മനാഭക്കുറുപ്പ്=>തെങ്ങ്

തെങ്ങിൻ തടികളെക്കൊണ്ടു

തീർപ്പിക്കാം കെട്ടിടങ്ങളെ;

ഉലക്ക മുതലായുള്ള

സാമാനം പണിയിച്ചിടാം.



ഓല കീറി മൊടഞ്ഞിട്ടീ

വീടു ചോരാതെ കെട്ടിയാൽ

മഴയും മറ്റുമേല്ക്കാതെ

പാർക്കാമിങ്ങു നമുക്കിതിൽ?



കുരുത്തോല പുഴുങ്ങീട്ടു

മഞ്ഞു കൊള്ളിച്ചുണക്കിയാൽ

തെറുത്തു തോടപോലാക്കി

പെൺകിടാങ്ങൾക്കണിഞ്ഞിടാം.



ചൂട്ടും മടലുമെല്ലാം തീ

മൂട്ടുവാൻ നല്ലതെത്രയും

കൂട്ടുവാൻ ചേർക്കുമിത്തേങ്ങ

യാട്ടുന്നതൊരു ലാഭമാം.



കുളുർത്തു മധുരിച്ചുള്ളോ

രിളന്നീരു കുടിക്കുകിൽ

തളർച്ച തീരുമെല്ലാർക്കും

വിളങ്ങും മുഖമേറ്റവും.



അകത്തുള്ളൊരു മാധുര്യം

ചോർന്നുപോകാതിരിക്കുവാൻ

കുരുക്കു നല്ല കാഠിന്യം

പുറമേ പൂണ്ടിടുന്നിതോ?



പല്ലു തേയ്‍പിനു പച്ചീർക്കി

ലില്ലെങ്കിൽ സുഖമായ്‍പരാ;

മെല്ലെ നാവിലഴുക്കെല്ലാ

മില്ലാതാക്കാനതുത്തമം.



ചിരട്ട തവികോട്ടാനും

കരിക്കമുപയോഗമാം;

മൊരിച്ചൂട്ടു വെളിച്ചെണ്ണ

യരിക്കുന്നതിനുത്തമം



തൊണ്ടഴുക്കിപ്പിരിപ്പിച്ചു

കൊണ്ടു നൽക്കയറാക്കിയാൽ

അണ്ടർകോനും കൊതിക്കുന്ന

പണ്ടമെല്ലാം കരസ്ഥമാം.



കള്ളെടുത്തു കുറുക്കീട്ടു

വെള്ളച്ചക്കരയാക്കിയാൽ

പിള്ളർക്കെന്നല്ല വല്യോർക്കും

കൊള്ളാം മധുരമുള്ളത്.



ഇത്രയ്ക്കുപകരിക്കുന്ന

നന്ദിയുള്ളൊരു തെങ്ങിനെ

സൂക്ഷിക്കണം നാമാകുന്ന

പോലതേകാത്തതെന്തിനെ?

---

Manglish Transcribe ↓

---

Azhakatthu pathmanaabhakkuruppu=>thengu

thengin thadikalekkondu

theerppikkaam kettidangale;

ulakka muthalaayulla

saamaanam paniyicchidaam. Ola keeri modanjittee

veedu choraathe kettiyaal

mazhayum mattumelkkaathe

paarkkaamingu namukkithil? Kurutthola puzhungeettu

manju kollicchunakkiyaal

therutthu thodapolaakki

penkidaangalkkaninjidaam. Choottum madalumellaam thee

moottuvaan nallathethrayum

koottuvaan cherkkumitthenga

yaattunnathoru laabhamaam. Kulurtthu madhuricchullo

rilanneeru kudikkukil

thalarccha theerumellaarkkum

vilangum mukhamettavum. Akatthulloru maadhuryam

chornnupokaathirikkuvaan

kurukku nalla kaadtinyam

purame poondidunnitho? Pallu they‍pinu paccheerkki

lillenkil sukhamaay‍paraa;

melle naavilazhukkellaa

millaathaakkaanathutthamam. Chiratta thavikottaanum

karikkamupayogamaam;

moricchoottu velicchenna

yarikkunnathinutthamam



thondazhukkippirippicchu

kondu nalkkayaraakkiyaal

andarkonum kothikkunna

pandamellaam karasthamaam. Kalledutthu kurukkeettu

vellacchakkarayaakkiyaal

pillarkkennalla valyorkkum

kollaam madhuramullathu. Ithraykkupakarikkunna

nandiyulloru thengine

sookshikkanam naamaakunna

polathekaatthathenthine?