ചങ്ങമ്പുഴ കൃഷ്ണപിള്ള=>▲ ആകാശഗംഗ



വരികയാ,ണീ വാനവവാഹിനീതീരത്തിൽ

വരികയാണിന്നു മജ്ജീവനാഥൻ.

ചിരകാലമായി ഞാൻ കൊതിയാർന്നു കാക്കുന്ന

തൊരുദിനമെൻ പ്രിയതമനെക്കണ്ടുമുട്ടാൻ.

മമ മഞ്ജുളമണിമേഖല മതിമോദമൊടൂരേണ്ടും

മധുരമുഹൂർത്തമടുത്തുപോയി !



"പരിപാവനമാമിസ്സനാതനസ്വർഗത്തിൽ

പ്പരിലസിച്ചീടുമിത്തടിനിതന്നിൽ;

അലയുമലമാലകളിലുലയും തൻ തോണിയി

ലലഘുകൌതൂഹലഭരിതനായി,

വരുമിന്നീ രാത്രിയി,ലൊരു സംശയമില്ല മേ;

വരുമിന്നെന്നരികിലെൻ ഹൃദയനാഥൻ !



"അണയുന്നു, പോകുന്നു, കുളിർകാറ്റുകൾ മുകിൽമാലക

ളണുപോലും തടവിയലാതിരുകരയിൽ.

ശരി,യെന്നാ,ലകലത്തിലവശനായമരു,മെൻ

വരനും, വിരഹാകുലയാമെനിക്കും,

തരമാവുകില്ലല്ലോ കൈമാറാനന്യോന്യ

മൊരുമട്ടിലുമാത്മസന്ദേശമൊന്നും !



"മറുകരയിലേക്കൊരാൾക്കൊരു കൊച്ചു കല്ലെടു

ത്തെറിയുവാൻ സാധിക്കും നിഷ്പ്രയാസം.

എന്നാലു,മിലപൊഴിയും കാലത്തിലല്ലാതൊ

ന്നന്യോന്യദർശനമാഗഹിക്കാൻ,

തരമില്ല, മോഹിച്ചാൽ ഫലമില്ല, കഷ്ട,മി

സ്സുരവാഹിനി ഞങ്ങളെ വേർപെടുത്തി,

അത്തലിന്നക്കരെയുമിക്കരെയും നിന്നെന്നു

മശ്രു പൊഴിക്കേണം, ഹാ, നിഹതർ ഞങ്ങൾ !



"ഇലപൊഴിയും കാലത്തെക്കുളിരിളകും തൈത്തെന്ന

ലലയാൻ തുടങ്ങിയ നാൾ മുതൽക്കേ;

അതികുതുകപൂർവകമെന്നോടുതന്നെ ഞാ

നിതുവിധം ചോദിച്ചുകൊണ്ടിരുന്നു:

'വന്നല്ലോ, ശുഭകാലം വന്നല്ലോ, ഹാ, ഞങ്ങ

ളെന്നിനിയൊന്നന്യോന്യം കണ്ടുമുട്ടും?'

ശരിതന്നെ, കാത്തു ഞാൻ ചിരകാലപ്രാർഥിതനെൻ

വരനെന്നാലിപ്പോഴിതാ വന്നുപോയി !



പെരുകിയിട്ടില്ലേറെസുരഗംഗയിൽ ജല,മെന്നാ

ലരികിലെഴുമരുവിയിതു തരണംചെയ്യാൻ,

അരുതിപ്പോഴു,മെങ്ങനെ പിന്നക്കരയിൽച്ചെന്നു ഞാ

നിരവിതിലെൻ കാമുകനെക്കാത്തുനിൽക്കും?...."



"അരികത്താണവൾ നിൽപതു, നന്നായിട്ടിങ്ങവൾതൻ

കരതലാച്ഛാദനചലനം കാണാം.

എന്നാലു,മൊരു വഴിയി,ല്ലിലപൊഴിയുംകാലം, ഹാ,

വന്നല്ലാതക്കരയിൽച്ചെന്നുപറ്റാൻ !



"ഒരു നിമിഷം, ഹാ ഞങ്ങൾ വേർപെട്ട വേളയി

ലൊരുനോക്കേ ഞാനവളെക്കണ്ടുള്ളൂ;

അതുമൊരുനിഴൽപോലെ ഞൊടിയിടയിൽ, മൂടലി

ലതിദൂരത്തൊരു ചഞ്ചല, ശലഭമ്പോലെ !

കളമൊഴിയെക്കാണുവാനിടയിനിയൊന്നാവോളം

കഴിയണം മോഹിച്ചു നിഷ്ഫലം ഞാൻ !...."



"സ്വയമെത്തുകയാണെന്നു തോന്നുന്നു തോണിയിൽ

പ്രിയതമയെക്കാണുവാൻ 'ഹിക്കോബോഷി'.

എന്തെന്നാൽ,സ്സുരഗംഗയിലുയരുന്നുണ്ടകലെച്ചില

പങ്കായച്ചാലുകൾതൻ ശീകരങ്ങൾ.

അവയൊന്നിച്ചൊരു നേരിയ മൂടൽമഞ്ഞിൽ ശൂഭ്ര

യവനികയായ് നദിനീളെപ്പരിലസിപ്പൂ !



"ഹിമധാരാശിശ്വരിതമിസ്സുരതടിനീതീരത്തിൽ

മമ നാഥനെ ഞാനേവം കാത്തിരിക്കെ;

നനുനനുത്തുള്ളോരെന്നുടയാടത്തളിർവക്കുകൾ

നനയാനിടയെമ്മട്ടോ വന്നുകൂടി.



"ശ്രാവണണികനിശയി,ലീ വരവാനവവാഹിനിയിൽ

മേവും കടത്തുകടവിലെങ്ങും,

ഓലിയിട്ടിട്ടുച്ചത്തി,ലിളകിമറിഞ്ഞെത്തുകയാ

ലമാലകളങ്ങനെ മാറി മാറി !

ഒരുപക്ഷേ വന്നേക്കാമിപ്പോൾത്തൻ തോണിയിൽ, ഞാൻ

ചിരനാളായ് കാക്കുമെൻ പ്രാണനാഥൻ !...."



"നീളമെഴും കൈയുറകൾക്കിയയലുമാച്ചുരുളുകൾ

നീളേ നിവർത്തിക്കൈത്തണ്ടു മൂടി;

'ടനബാറ്റ'യുറക്കമാണരുണദ്യുതി വിതറിക്കൊ

ണ്ടിനി മിന്നിപ്പുലർകാലത്തെത്തുവോളം;

ജലവീഥിയിലലയുമെൻ ചക്രവാകങ്ങളേ,

വിലപി,ച്ചവളെ നിങ്ങളുണർത്തരുതേ !



"ഒരു മൂടൽമഞ്ഞെത്തിസ്സുരഗംഗയെ മൂടുന്ന

തരുമയവൾ കാണു,മുടൻ കരുതുമേവം;

'ഇന്നു വരു,മിന്നു വരും ചിരനാളായ്ക്കാക്കുമെൻ

ഹൃന്നായകനിന്നു വരുമെന്നരികിൽ!..."



"സുരഗംഗയി,ലാ 'യാസു'ക്കടവരികിൽ,ത്തിരകളി

ലൊരു കൊച്ചുകളിത്തോണി തത്തിനിൽപൂ !

ഞാനിവിടെക്കാത്തിതാ നിൽക്കുകയാണെൻ

പ്രാണേശനൊറ്റൊന്നയേ്യാ, പറയണമേ..."



"ഒരു താരകദേവൻ ഞാൻ, കഴിയുമെന്നിഷ്ടമ്പോൽ

സ്സുരപഥം മുഴുവനും സഞ്ചരിക്കാൻ.

എന്നാലു,മൊക്കില്ലിവനോമനേ, നീയെന്നെയീ

വിണ്ണാറു കടന്നക്കരെ വന്നു കാണാൻ !



"ശൂലങ്ങളെണ്ണായിരമേന്തുമദ്ദേവൻ തൻ

കാലംതൊട്ടെൻ വധുവാണവ,ളെന്നാലും ;

അറിയാനിടയായിട്ടില്ലാർക്കുമതാ വൃത്താന്തം

പരമരഹസ്യമായൊളിവിൽ നിന്നു.

എന്നാ,ലവളോടെനിക്കനിയന്ത്രിതമാം മട്ടി

ലെന്നാളും തോന്നിടുമീയാശമൂലം,

അറിയാനിടയായേവം മർത്ത്യനുംകൂടിയി

ന്നവളോടെനിക്കെഴും ഗൂഡബന്ധം !



"ഭൂവനവും വാനവും വേർപെട്ടകാലംതൊ

ട്ടവളെൻപ്രിയസഹധർമിണിയായിരുന്നു.

എന്നാലും കാക്കണമിലപൊഴിയുംനാളോള

മെന്നെന്നു,മെനിക്കവളോടൊത്തുചേരാൻ !



"ചേണഞ്ചും ശോണിമ കവിളിണയിൽ തഞ്ചു,മെൻ

പ്രാണാധിനായികയോടൊത്തുകൂടി;

തളിരുകളും മലരുകളും വിതറിയതാമൊരു ശിലാ

തളിമത്തിൽ,സ്സുഖസുപ്തിയിലാണ്ടലിയാൻ;

ഈ രാത്രിയിൽ, നിശ്ചയം, സുരുചിരസുരഗംഗാ

തീരത്തിലിറങ്ങി ഞാൻ ചെന്നുചേരും !..."



"ഇലപൊഴിയുംകാലത്തെക്കുളുർകാറ്റിൽ, വിണ്ണാറ്റിൽ,

ജലശൈവലവലയാവലിയിളകിടുമ്പോൾ;

സുരഗംഗയിലുടനകലെകേൾക്കാമൊരു രാത്തോണി

തെരുതെരെത്തുഴയും ചില ശബ്ദഘോഷം !

അലമാലകൾ തുഴ തട്ടിപ്ലാച്ചായിഗ്ഗുളുഗുളുവെ

ന്നൊലികൾ വമിച്ചിളകുമതിൻ മാറ്റൊലികൾ !...."



"രജനിയിലെൻ രമണിയുമൊത്തൊരുമിച്ചന്യോന്യം

രമണീയരത്നോപധാനം മാറി;

നിദ്രചെയ്തീടുമ്പോൾപ്പുലർകാലം വന്നാലും

നിർദ്ദയം കുക്കുടമേ, കൂകരുതേ !



"പരകോടിജന്മങ്ങളഭിമുഖമായന്യോന്യം

കരതളിർക്കരതളിർകോർത്തമരുകിലും ;

കരകവിയും ഞങ്ങൾതൻ മധുമധുരപ്രണയത്തി

നൊരുനാളുമറുതിവരില്ലൊരുവിധവും !

കരളലിവില്ലാതിസ്സുരലോകം പിന്നെന്തിനു

കരുതുന്നതു ഞങ്ങളെ വേർപെടുത്താൻ ?



"മനതാരിൽക്കുതുകത്തൊടു, നിജനിലയത്തിങ്കലെൻ

'ടനബാറ്റ'നെയ്തൊരാമൃദുലവസ്ത്രം ;

പരിചിലെന്മേനിയിലണിയുവതിനിന്നിപ്പോ

ളൊരു മഞ്ചുളകഞ്ചുകമായ്ത്തീർന്നിരിക്കും !...."



"അരുമയവളകലെയാണഞ്ഞൂറു വെണ്മുകിൽ

ച്ചുരുളുകക്കകലെ മറഞ്ഞവളിരിപ്പൂ !

എന്നാലും, നിത്യം നിശയിങ്കലെന്നനുജയാം

കണ്മണിതൻ വസതിയെ ഞാനുറ്റുനോക്കും !...."



"ഇലപൊഴിയുംകാലംവന്നെത്തുമ്പോൾ,സ്സുരനദിയിൽ

ക്കുളുർമൂടൽമഞ്ഞുകൾ പരന്നീടുമ്പോൾ;

തിരിയുമുടൻ തടിനീതടമേഖലയിലേക്കു ഞാൻ

തിരളുമത്യാശയോടകതളിരിൽ !

കുറെയൊന്നുമല്ലോർക്കിലനവധിയാണെന്മോഹം

നിറയിന്നോരത്തരം യാമിനികൾ !



"എന്നാലും കൊല്ലത്തിലൊരുനാളി,ലേഴാമതു

വന്നീടും മാസത്തിലേഴാംനാളിൽ;

ചേണഞ്ചിടുമാ രാത്രിയിലല്ലാതെൻ രമണനെ

ക്കാണാനെനിക്കയ്യോ, തരമില്ലല്ലോ !



"ഒരു രാത്രിയിൽമാത്രം! ഹാ, ഞങ്ങൾക്കൊന്നന്യോന്യം

പരമപവിത്രമപ്രണയപൂരം,

പകരാനിടയാകില്ല,പരിതൃപ്തിയുമായില്ല

പകലപ്പോഴേക്കുമതാ വന്നുപോയി !



"ഒരു നീണ്ടകൊല്ലത്തെ പ്രണയാഭിലാഷങ്ങ

ളൊരു നിശകൊണ്ടിന്നൊന്നോടൊത്തൊടുങ്ങി;

ഇനി നാളെമുതൽക്കിങ്ങനെ മമ നാഥനെയോർത്തയ്യോ,

മനമുരുകിക്കഴിയണമനുദിനം ഞാൻ !



"അനുരാഗപരവശയാം 'ടനബാറ്റാത്സ്യൂമേ'യു

മനുകനാമാ 'ഹിക്കോബിഷി'യുമായ്;

നിയമിതമാം സന്ദർശനോത്സവം കൊണ്ടാടും

നിശയാണിതു നിങ്ങളറിഞ്ഞുകൊൾവിൻ !

അതുമൂലമനുവേലം സുരഗംഗയിലലയുന്നോ

രലമാലകളേ, നിങ്ങളുയരരുതേ !...."



"ഇലപൊഴിയുംകാലത്തെക്കുളുർകാറ്റിലുലഞ്ഞുല

ഞ്ഞിവിടേക്കണയുന്നൊരാ വെള്ളിമേഘം ;

സുന്ദരിയെൻ 'ടനബാറ്റാത്സ്യൂമേ'തൻ സ്വർഗ്ഗീയ

സന്ദേശഹരനാകാമാരറിഞ്ഞു ?..."



"പരിചിലിടയ്ക്കിടെക്കാണാൻ തരപ്പെടു

മൊരുവനതല്ലല്ലോ മജ്ജീവനാഥൻ.

അരുതിനിത്താമസം സുരഗംഗയിലൂടെയ

ച്ചെറുതോണി തുഴ,ഞ്ഞയ്യോ, വരിക വേഗം !

വെറുതേയമാന്തത്താൽ വിലപെടുമീ രാത്രിയിൽ

ക്കുറെനേരം പാഴായാൽക്കഷ്ടമല്ലേ?...



"നേരം കുറെ വൈകിയിസ്സുരഗംഗയിലിരവിലൊരു

നേരിയ മൂടൽമഞ്ഞാപതിപ്പൂ.

പുഴയിലെൻപ്രിയ 'ഹിക്കോബോഷി' പങ്കായത്താൽ

ത്തുഴയും സ്വരവീചികൾ സംക്രമിപ്പൂ.



"തെരുതെരെക്കേൾക്കുന്നൂ സുരഗംഗയിലകലെനി

ന്നൊരുനിനദ,മനുമാത്രം വ്യക്തമായി.

അതു 'ഹിക്കോബോഷി'യത്തോണി തുഴഞ്ഞീടുമ്പോ

ളലകൾ മുറിഞ്ഞുതിരുന്ന ശബ്ദമല്ലേ?



"ധൃതഗതിയിൽ മൽപ്രിയൻ തുഴയുമ്പോൾപ്പങ്കായ

ക്കുതിയിൽത്തിരമാലകൾ നുറുനുറുങ്ങായ്;

ചിന്നിത്തെറിച്ചുതിരും കുളിർശീകരധാരയായ്

വന്നിടാമീയന്തിച്ചാറ്റലുകൾ !



"നാളെമുതൽ;ക്കഷ്ടമെൻ മണിമെത്ത വിരിച്ചാത്മ

നായകനെയോർത്തോർത്തതിദീനയായി,

കഴിയണം കണ്ണീരും കയ്യുമായ് സുപ്തിയിൽ

മുഴുകണ,മയ്യോ, ഞാനേകയായി !



"സുരഗംഗയിലുടനീളം കാറ്റടികൾക്കൂക്കേറി

ത്തിരമാലകളൊട്ടുക്കുയർന്നുപോയി.

ഒരു കളിത്തോണിയിൽക്കയറിയൊന്നിക്കരയിൽ

വരുവാനിനിയങ്ങൊട്ടും വൈകരുതേ !

കരുതരുതേ മടി തെല്ലുമയ്യോ, ഞാനങ്ങതൻ

കഴൽപ്പിടിച്ചർത്ഥിപ്പൂ ജീവനാഥ !...."



"സ്വർലോകതരംഗിണിയിലല്ലല്ലാ, പെട്ടെന്ന

ക്കല്ലോലമൊട്ടുക്കുയർന്നുവല്ലോ !

എന്നാലും, തെരുതെരെത്തുഴയേണ,മിരുട്ടും മുൻ

പിന്നെനിക്കെത്തീടണമക്കരയിൽ !...."



"കാലം കുറെയായല്ലോ നെയ്തു ഞാൻ തീർത്തി,ട്ടെൻ

കാമുകനു നൽകാ, നീ മൃദുലവസ്ത്രം.

ഇന്നന്തിയിലവസാനത്തുന്നൽപ്പണികൂടിയും

നന്നായിച്ചെയ്തിതു ഞാൻ പൂർത്തിയാക്കി.

ആനന്ദദായകനാമങ്ങെത്തുന്നീലല്ലോ !

ഞാനിനിയുമെന്തിനിദം കാത്തിരിപ്പൂ ?....



"അമരാപഗയിൽനിന്നുയരുവതെ,ന്തുഗമാ

മലമാലകളലറീടുമിരമ്പമല്ലേ ?

മുന്നോട്ടിരുളിൽപ്പുതഞ്ഞിരവു നീങ്ങുന്നു; ഹാ,

വന്നിട്ടില്ലെന്നിട്ടും 'ഹിക്കോബോഷി!'



"ഇലപൊഴിയുംകാലത്തെക്കുളിർക്കാറ്റു വീശുവാ

നിടയായോരാദ്യത്തെ ദിവസംതന്നെ;

അതികുതുകമുൾക്കൊണ്ടിറങ്ങിത്തിരിച്ചേ,നീ

യമരസരിത്തീരത്തേക്കേകയായ് ഞാൻ !

നിൽക്കുകയാണിപ്പോഴും കാത്തിവിടെ ഞാ,നെന്നൊ

ന്നുൾക്കനിവാർന്നെൻപ്രിയനോടോതണമേ !...."



"കരുതുന്നു ഞാനിപ്പോൾ 'ടനബാറ്റ'യിങ്ങോട്ടു

വരികയാണവൾതൻ തോണിയിങ്കൽ:

എന്തെന്നാൽ നീങ്ങുന്നുണ്ടൊരു മേഘം, കുറുകെയ

ച്ചന്ദ്രന്തൻ ലളിതാസ്യമദൃശ്യമാക്കി !...."

---

Manglish Transcribe ↓

---

Changampuzha krushnapilla=>▲ aakaashagamga



varikayaa,nee vaanavavaahineetheeratthil

varikayaaninnu majjeevanaathan. Chirakaalamaayi njaan kothiyaarnnu kaakkunna

thorudinamen priyathamanekkandumuttaan. Mama manjjulamanimekhala mathimodamodoorendum

madhuramuhoortthamadutthupoyi !



"paripaavanamaamisanaathanasvargatthil

pparilasiccheedumitthadinithannil;

alayumalamaalakalilulayum than thoniyi

lalaghukouthoohalabharithanaayi,

varuminnee raathriyi,loru samshayamilla me;

varuminnennarikilen hrudayanaathan !



"anayunnu, pokunnu, kulirkaattukal mukilmaalaka

lanupolum thadaviyalaathirukarayil. Shari,yennaa,lakalatthilavashanaayamaru,men

varanum, virahaakulayaamenikkum,

tharamaavukillallo kymaaraananyonya

morumattilumaathmasandeshamonnum !



"marukarayilekkoraalkkoru kocchu kalledu

ttheriyuvaan saadhikkum nishprayaasam. Ennaalu,milapozhiyum kaalatthilallaatho

nnanyonyadarshanamaagahikkaan,

tharamilla, mohicchaal phalamilla, kashda,mi

suravaahini njangale verpedutthi,

atthalinnakkareyumikkareyum ninnennu

mashru pozhikkenam, haa, nihathar njangal !



"ilapozhiyum kaalatthekkulirilakum thytthenna

lalayaan thudangiya naal muthalkke;

athikuthukapoorvakamennoduthanne njaa

nithuvidham chodicchukondirunnu:

'vannallo, shubhakaalam vannallo, haa, njanga

lenniniyonnanyonyam kandumuttum?'

sharithanne, kaatthu njaan chirakaalapraarthithanen

varanennaalippozhithaa vannupoyi ! Perukiyittilleresuragamgayil jala,mennaa

larikilezhumaruviyithu tharanamcheyyaan,

aruthippozhu,mengane pinnakkarayilcchennu njaa

niravithilen kaamukanekkaatthunilkkum?...."



"arikatthaanaval nilpathu, nannaayittingavalthan

karathalaachchhaadanachalanam kaanaam. Ennaalu,moru vazhiyi,llilapozhiyumkaalam, haa,

vannallaathakkarayilcchennupattaan !



"oru nimisham, haa njangal verpetta velayi

lorunokke njaanavalekkandulloo;

athumorunizhalpole njodiyidayil, moodali

lathidooratthoru chanchala, shalabhampole ! Kalamozhiyekkaanuvaanidayiniyonnaavolam

kazhiyanam mohicchu nishphalam njaan !...."



"svayametthukayaanennu thonnunnu thoniyil

priyathamayekkaanuvaan 'hikkoboshi'. Enthennaal,suragamgayiluyarunnundakalecchila

pankaayacchaalukalthan sheekarangal. Avayonnicchoru neriya moodalmanjil shoobhra

yavanikayaayu nadineelepparilasippoo !



"himadhaaraashishvarithamisurathadineetheeratthil

mama naathane njaanevam kaatthirikke;

nanunanutthullorennudayaadatthalirvakkukal

nanayaanidayemmatto vannukoodi.



"shraavananikanishayi,lee varavaanavavaahiniyil

mevum kadatthukadavilengum,

oliyittittucchatthi,lilakimarinjetthukayaa

lamaalakalangane maari maari ! Orupakshe vannekkaamippoltthan thoniyil, njaan

chiranaalaayu kaakkumen praananaathan !...."



"neelamezhum kyyurakalkkiyayalumaacchurulukal

neele nivartthikkytthandu moodi;

'danabaatta'yurakkamaanarunadyuthi vitharikko

ndini minnippularkaalatthetthuvolam;

jalaveethiyilalayumen chakravaakangale,

vilapi,cchavale ningalunarttharuthe !



"oru moodalmanjetthisuragamgaye moodunna

tharumayaval kaanu,mudan karuthumevam;

'innu varu,minnu varum chiranaalaaykkaakkumen

hrunnaayakaninnu varumennarikil!..."



"suragamgayi,laa 'yaasu'kkadavarikil,tthirakali

loru kocchukalitthoni thatthinilpoo ! Njaanividekkaatthithaa nilkkukayaanen

praaneshanottonnaye്yaa, parayaname..."



"oru thaarakadevan njaan, kazhiyumennishdampol

surapatham muzhuvanum sancharikkaan. Ennaalu,mokkillivanomane, neeyenneyee

vinnaaru kadannakkare vannu kaanaan !



"shoolangalennaayiramenthumaddhevan than

kaalamthotten vadhuvaanava,lennaalum ;

ariyaanidayaayittillaarkkumathaa vrutthaantham

paramarahasyamaayolivil ninnu. Ennaa,lavalodenikkaniyanthrithamaam matti

lennaalum thonnidumeeyaashamoolam,

ariyaanidayaayevam martthyanumkoodiyi

nnavalodenikkezhum goodabandham !



"bhoovanavum vaanavum verpettakaalamtho

ttavalenpriyasahadharminiyaayirunnu. Ennaalum kaakkanamilapozhiyumnaalola

mennennu,menikkavalodotthucheraan !



"chenanchum shonima kavilinayil thanchu,men

praanaadhinaayikayodotthukoodi;

thalirukalum malarukalum vithariyathaamoru shilaa

thalimatthil,sukhasupthiyilaandaliyaan;

ee raathriyil, nishchayam, suruchirasuragamgaa

theeratthilirangi njaan chennucherum !..."



"ilapozhiyumkaalatthekkulurkaattil, vinnaattil,

jalashyvalavalayaavaliyilakidumpol;

suragamgayiludanakalekelkkaamoru raatthoni

therutheretthuzhayum chila shabdaghosham ! Alamaalakal thuzha thattiplaacchaayigguluguluve

nnolikal vamicchilakumathin maattolikal !...."



"rajaniyilen ramaniyumotthorumicchanyonyam

ramaneeyarathnopadhaanam maari;

nidracheytheedumpolppularkaalam vannaalum

nirddhayam kukkudame, kookaruthe !



"parakodijanmangalabhimukhamaayanyonyam

karathalirkkarathalirkortthamarukilum ;

karakaviyum njangalthan madhumadhurapranayatthi

norunaalumaruthivarilloruvidhavum ! Karalalivillaathisuralokam pinnenthinu

karuthunnathu njangale verpedutthaan ?



"manathaarilkkuthukatthodu, nijanilayatthinkalen

'danabaatta'neythoraamrudulavasthram ;

parichilenmeniyilaniyuvathininnippo

loru manchulakanchukamaayttheernnirikkum !...."



"arumayavalakaleyaananjooru venmukil

cchurulukakkakale maranjavalirippoo ! Ennaalum, nithyam nishayinkalennanujayaam

kanmanithan vasathiye njaanuttunokkum !...."



"ilapozhiyumkaalamvannetthumpol,suranadiyil

kkulurmoodalmanjukal paranneedumpol;

thiriyumudan thadineethadamekhalayilekku njaan

thiralumathyaashayodakathaliril ! Kureyonnumallorkkilanavadhiyaanenmoham

nirayinnorattharam yaaminikal !



"ennaalum kollatthilorunaali,lezhaamathu

vanneedum maasatthilezhaamnaalil;

chenanchidumaa raathriyilallaathen ramanane

kkaanaanenikkayyo, tharamillallo !



"oru raathriyilmaathram! Haa, njangalkkonnanyonyam

paramapavithramapranayapooram,

pakaraanidayaakilla,parithrupthiyumaayilla

pakalappozhekkumathaa vannupoyi !



"oru neendakollatthe pranayaabhilaashanga

loru nishakondinnonnodotthodungi;

ini naalemuthalkkingane mama naathaneyortthayyo,

manamurukikkazhiyanamanudinam njaan !



"anuraagaparavashayaam 'danabaattaathsyoome'yu

manukanaamaa 'hikkobishi'yumaayu;

niyamithamaam sandarshanothsavam kondaadum

nishayaanithu ningalarinjukolvin ! Athumoolamanuvelam suragamgayilalayunno

ralamaalakale, ningaluyararuthe !...."



"ilapozhiyumkaalatthekkulurkaattilulanjula

njividekkanayunnoraa vellimegham ;

sundariyen 'danabaattaathsyoome'than svarggeeya

sandeshaharanaakaamaararinju ?..."



"parichilidaykkidekkaanaan tharappedu

moruvanathallallo majjeevanaathan. Aruthinitthaamasam suragamgayiloodeya

ccheruthoni thuzha,njayyo, varika vegam ! Verutheyamaanthatthaal vilapedumee raathriyil

kkureneram paazhaayaalkkashdamalle?...



"neram kure vykiyisuragamgayiliraviloru

neriya moodalmanjaapathippoo. Puzhayilenpriya 'hikkoboshi' pankaayatthaal

tthuzhayum svaraveechikal samkramippoo.



"therutherekkelkkunnoo suragamgayilakaleni

nnoruninada,manumaathram vyakthamaayi. Athu 'hikkoboshi'yatthoni thuzhanjeedumpo

lalakal murinjuthirunna shabdamalle?



"dhruthagathiyil malpriyan thuzhayumpolppankaaya

kkuthiyiltthiramaalakal nurunurungaayu;

chinnitthericchuthirum kulirsheekaradhaarayaayu

vannidaameeyanthicchaattalukal !



"naalemuthal;kkashdamen manimettha viricchaathma

naayakaneyortthortthathideenayaayi,

kazhiyanam kanneerum kayyumaayu supthiyil

muzhukana,mayyo, njaanekayaayi !



"suragamgayiludaneelam kaattadikalkkookkeri

tthiramaalakalottukkuyarnnupoyi. Oru kalitthoniyilkkayariyonnikkarayil

varuvaaniniyangottum vykaruthe ! Karutharuthe madi thellumayyo, njaanangathan

kazhalppidiccharththippoo jeevanaatha !...."



"svarlokatharamginiyilallallaa, pettenna

kkallolamottukkuyarnnuvallo ! Ennaalum, therutheretthuzhayena,miruttum mun

pinnenikkettheedanamakkarayil !...."



"kaalam kureyaayallo neythu njaan theertthi,tten

kaamukanu nalkaa, nee mrudulavasthram. Innanthiyilavasaanatthunnalppanikoodiyum

nannaayiccheythithu njaan poortthiyaakki. Aanandadaayakanaamangetthunneelallo ! Njaaniniyumenthinidam kaatthirippoo ?....



"amaraapagayilninnuyaruvathe,nthugamaa

malamaalakalalareedumirampamalle ? Munnottirulilpputhanjiravu neengunnu; haa,

vannittillennittum 'hikkoboshi!'



"ilapozhiyumkaalatthekkulirkkaattu veeshuvaa

nidayaayoraadyatthe divasamthanne;

athikuthukamulkkondirangitthiricche,nee

yamarasarittheeratthekkekayaayu njaan ! Nilkkukayaanippozhum kaatthivide njaa,nenno

nnulkkanivaarnnenpriyanodothaname !...."



"karuthunnu njaanippol 'danabaatta'yingottu

varikayaanavalthan thoniyinkal:

enthennaal neengunnundoru megham, kurukeya

cchandranthan lalithaasyamadrushyamaakki !...."