ചങ്ങമ്പുഴ കൃഷ്ണപിള്ള=>▲ പാരവശ്യം ബാഷ്പാഞ്ജലി

മധുരചിന്തകളിളകും സങ്കൽപ

മധുവിധുകാലരജനികൾ,

ഹൃദയനാളത്തെത്തഴുകി, മന്ദമെൻ

വിജനശയ്യയിലണയവെ;

ഉദിതതാരകളിരുളിലെമ്പാടു

മമൃതധോരണിചൊരിയവേ;

ഇനിയും പൂങ്കുയിൽ മുഴുവനാക്കാത്ത

പ്രണയഗാനത്തിൻശകലങ്ങൾ

പലതു, മയ്യയ്യോ, ശിഥിലമായൊരീ

മുരളിയിൽവന്നു നിറയുന്നു.

ഫലമെന്തെന്നാലു,മൊരുരാഗം പോലും

പൊഴിയുവാനതിനരുതല്ലോ.

കഴിയണമോരോ ദിനവുമെണ്ണി ഞാ

നിതുവിധം ഘോരകദനത്തിൽ!

* * *

പുലരിപ്പൊന്നിളവെയിലുലകിനെ

പ്പുളകപ്പൂമ്പട്ടിൽ പൊതിയവെ;

സുഖദശീകരമിളിതശീതള

സുരഭിലാനിലനിളകവെ;

മൃദുലനിദ്രതന്മടിയിൽനിന്നുമെൻ

വ്രണിതമാം ജീവനുണരവെ;

അവളെ,കഷ്ട ,മെന്നരികിൽ കാണാതെൻ

ഹൃദയം നൊന്തു ഞാൻ കരയുന്നു.

ഒരുകിനാവിലെ ക്ഷണികസല്ലാപ

സ്മരണമാത്രമുണ്ടിനിയെന്നിൽ

പരിധിയില്ലാത്ത പരമശൂന്യത

യ്ക്കിടയിലുള്ളോരോ ചുഴികളിൽ,

ഇരുളും ഞാനുമായ് തഴുകിയന്യോന്യ

മിനിയുമെത്ര നാൾ കഴിയണം?

ഹൃദയസങ്കൽപവിപുലസീമയ്ക്കു

മകലെയുള്ളേതോ വനികയിൽ,

ഭജനലോലയായ് കഴികയാണവൾ

പ്രണയലേഖമൊന്നെഴുതുവാൻ.

വിരഹചിന്തയാൽ വിവശനായൊരെൻ

വിവിധസന്തപ്തസ്മരണകൾ,

ചിറകടിച്ചടിച്ചമരസാമ്രാജ്യ

പരിധിയും കടന്നുയരിലും,

അവളെന്നെധ്യാനിച്ചമരും ചന്ദന

ത്തണലിലെന്നിനിയണയും ഞാൻ!

കനകനക്ഷത്രപ്പൊടിവിതറിയ

ഗഗനവീഥിയിൽമുഴുവനും,

ഒരു മനോഹരമണിമേഘത്തേരി

ലവളെ നോക്കി ഞാൻ പലദിനം,

വഴിചോദിക്കുവാനൊരുവനില്ലാതാ

വിജനതയിലൊട്ടുഴറിനേൻ.

ഒരുകാലത്തിനിയവളോടിക്കഥ

പരിഭവമായിപ്പറയും ഞാൻ!

* * *

മൃദുലചുംബനസുലഭമായൊര

ക്കുസുമശയ്യയിലൊരുനാളിൽ,

നറുനിലാവിങ്കലിരുവർ ഞങ്ങളൊ

ത്തവികലാനന്ദഭരിതരായ്

അമിതരാഗാർദ്രസരസസല്ലാപ

കുതുകികളായിമരുവുകിൽ,

വെറുമസൂയയാ,ലൊരു പക്ഷേ, ലോകം

പഴുതേചൊന്നേയ്ക്കാം പരിഭവ!

പ്രണയസുന്ദരകലഹകല്ലോല

ച്ചുരുളിൽഞങ്ങളന്നുരുളുമ്പോൾ,

കൊതിയാകും മന്നിനൊരു കൊച്ചോമന

മുരളിയായ്മേലിൽകഴിയുവാൻ.

കവനമോഹിനിയവളെന്നെയൊരു

പുളകമായ് മാറ്റും നിമിഷത്തിൽ,

അറിയും ഞാ, നോരോ കുയിലുമന്നോളം

ചൊരിയും ഗീതത്തിൻ പൊരുളുകൾ.

സതതമെൻ മനം തകരു, മാ രമ്യ

സുദിനമെന്മുന്നിലണവോളം!!

---

Manglish Transcribe ↓

---

Changampuzha krushnapilla=>▲ paaravashyam baashpaanjjali

madhurachinthakalilakum sankalpa

madhuvidhukaalarajanikal,

hrudayanaalatthetthazhuki, mandamen

vijanashayyayilanayave;

udithathaarakalirulilempaadu

mamruthadhoranichoriyave;

iniyum poonkuyil muzhuvanaakkaattha

pranayagaanatthinshakalangal

palathu, mayyayyo, shithilamaayoree

muraliyilvannu nirayunnu. Phalamenthennaalu,moruraagam polum

pozhiyuvaanathinaruthallo. Kazhiyanamoro dinavumenni njaa

nithuvidham ghorakadanatthil!

* * *

pularipponnilaveyilulakine

ppulakappoompattil pothiyave;

sukhadasheekaramilithasheethala

surabhilaanilanilakave;

mrudulanidrathanmadiyilninnumen

vranithamaam jeevanunarave;

avale,kashda ,mennarikil kaanaathen

hrudayam nonthu njaan karayunnu. Orukinaavile kshanikasallaapa

smaranamaathramundiniyennil

paridhiyillaattha paramashoonyatha

ykkidayilulloro chuzhikalil,

irulum njaanumaayu thazhukiyanyonya

miniyumethra naal kazhiyanam? Hrudayasankalpavipulaseemaykku

makaleyulletho vanikayil,

bhajanalolayaayu kazhikayaanaval

pranayalekhamonnezhuthuvaan. Virahachinthayaal vivashanaayoren

vividhasanthapthasmaranakal,

chirakadicchadicchamarasaamraajya

paridhiyum kadannuyarilum,

avalennedhyaanicchamarum chandana

tthanalilenniniyanayum njaan! Kanakanakshathrappodivithariya

gaganaveethiyilmuzhuvanum,

oru manoharamanimeghattheri

lavale nokki njaan paladinam,

vazhichodikkuvaanoruvanillaathaa

vijanathayilottuzharinen. Orukaalatthiniyavalodikkatha

paribhavamaayipparayum njaan!

* * *

mrudulachumbanasulabhamaayora

kkusumashayyayilorunaalil,

narunilaavinkaliruvar njangalo

tthavikalaanandabharitharaayu

amitharaagaardrasarasasallaapa

kuthukikalaayimaruvukil,

verumasooyayaa,loru pakshe, lokam

pazhuthechonneykkaam paribhava! Pranayasundarakalahakallola

cchurulilnjangalannurulumpol,

kothiyaakum manninoru kocchomana

muraliyaaymelilkazhiyuvaan. Kavanamohiniyavalenneyoru

pulakamaayu maattum nimishatthil,

ariyum njaa, noro kuyilumannolam

choriyum geethatthin porulukal. Sathathamen manam thakaru, maa ramya

sudinamenmunnilanavolam!!